Sa patuloy na kawalan ng tugon ni Baldoz:  Protest camp, itinayo sa harap mismo ng DoLE! 

11223325_677326002398163_1399443635267157636_n

11223325_677326002398163_1399443635267157636_n

Intramuros, Maynila – Isang protest camp ang itinayo sa harap mismo ng Department of Labor and Employment (DoLE) dahil hindi na masikmura ng mga manggagawa mula sa Timog Katagalugan ang kawalang pakialam ni Rosalinda Baldoz.

Matagumpay na naitayo ang protest camp o kubol sa harap ng DoLE sa ganap na 5:00PM ngayong July 13, bilang pagpapakita ng disgusto ng mga manggagawa sa patung-patong na mga kasong nakabinbin sa nasabing ahensiya.

Ani Roque Polido, tagapangulo ng Pagkakaisa ng mga Manggagawa sa Timog Katagalugan (PAMANTIK-KMU), pangunahing pumapatay sa kabuhayan ng mga manggagawa ngayon sa bansa ang malawakang kontraktwalisasyon. “Hindi kailanman nagkaroon ng hakbang si Baldoz upang resolbahin ang malalim na ugat ng kahirapan ng sektor ng paggawa, kasama na ang kawalan ng kaseguruhan sa trabaho, mababang pasahod at kawalan ng benepisyo naming mga manggagawa,” saad ni Polido.

Napapanahon umano ang pagtatayo ng protest camp dahil na rin sa mga hindi naibibigay na hinaing ng mga manggagawa sa mga sonang industriyal sa Laguna: partikular sa Tanduay, Sagara, Karzai, Fuji at marami pang iba.

“Magdadalawang buwan na kaming nakawelga ngunit nananatiling hilaw ang desisyon ng DoLE sa aming regularisasyon. Malala pa dito, walang hakbang ang Tanduay management na ipatupad ito. Nasaan ngayon ang DoLE na siyang dapat nagtatanggol sa amin?” tanong ni Anse Are, tagapangulo ng Tanggulang Ugnayan Daluyang Lakas ng Anakpawis sa Tanduay Distillers Inc. (TUDLA).

Simula pa noong Mayo 18 ay ipinutok ng mga manggagawang kontraktwal ng Tanduay sa Cabuyao ang kanilang welga upang ipanawagan ang regularisasyon. Naglabas nitong June 22 ang DoLE Region IV-A ng kautusan sa management na dapat na silang i-regularisa subalit 103 lamang ito sa kabuuang 397 manggagawang kontraktwal o 90% ng lakas-paggawa sa Tanduay. Patuloy na “nakasaad lamang ito sa papel” at nakabitin sa walang-katiyakan ang desisyong ito.

Samantala, matapos ang higit isang taon ng pagsunod sa rekisitos ng pagbubuo ng unyon – pagdurog sa kanilang unyon at malawakang kontraktwalisasyon rin ang problema ng mga manggagawa ng Sagara Metro Plastics Industrial Corp. Noong Abril 8 ay arbitraryong ipinatigil ng kautusan ng Malacañang ang kanilang Certification Elections. Makailang ulit na silang naghain ng reklamo sa DoLE at nagrehistro ng protesta rito subalit walang usad ang kanilang kalagayan.

Panggigipit naman sa Collective Bargaining Agreement ang nararanasan ng unyon ng Fuji Electric Philippines, samantalang matagumpay mang nakabalik sa trabaho ang iligal na tinanggal sa Karzai Corp. ay patuloy ang panganib na matanggal dahil sa kontraktwalisasyon sa kanilang pagawaan.

“Ilan lamang ito sa garapalang pagyurak sa karapatan ng mga manggagawa sa aming rehiyon, at ito’y hindi nalalayo sa nangyari sa mga manggagawang kontraktwal ng Kentex na walang hustisiya dalawang buwan na ang nakararaan,” ani Polido.

Ani Polido kasama ang mga iba’t ibang manggagawa, patikim lamang ang nabanggit na protest camp sa nagkakaisang hanay at lakas ng mga manggagawa at mamamayan sa darating na huling State of the Nation Address ni Noynoy Aquino. Bagama’t may banta ng dispersal mula sa security guards at kapulisan ay desidido silang pagtibayin ang hanay hangga’t hindi humaharap si Baldoz at makipag-usap upang tunay na makatulong sa mga manggagawa.

“Kung patuloy na magbibingi-bingihan ang rehimen sa aming hinaing, ang maidudulot lamang nito ay ang paglakas ng sama-samang pagkilos ng mamamayan upang mailantad at patalsikin ang rehimen at sa kalaunan ay palitan ang bulok na sistemang hindi kailanman nagsisilbi sa mga manggagawa,” saad ni Polido. #

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s