Isang taon makalipas ang iligal na pagsasara ng HOYA: Tuloy ang pakikibaka para sa katarungan sa paggawa!

10994326_1559714180982267_5345794888760128795_o

10994326_1559714180982267_5345794888760128795_o

Isang taon ang nakalipas simula noong sinalanta ang kabuhayan ng 2,600 manggagawa dahil sa illegal closure ng HOYA Glass Disc Philippines sa First Philippine Industrial Park (FPIP), Sto. Tomas, Batangas. Isang patunay na walang malasakit ang mga kapitalista sa kapakanan ng mga manggagawang nagpapagod para lamang sa pagpapalago ng kanilang luho at tubo.

Noong Abril 30, 2014, sa bisperas ng Pandaigdigang Araw ng Paggawa, ay bigla na lamang ibinaba ang balita ng pagkakatanggal. Ipinwersa kaming tanggapin na lamang ang huling sahod at separation pay – sa kabila ng pagiging iligal ng Notice of Closure na hindi dumaan sa tamang prosesong nakasaad sa batas. Ikinatwiran ng management na nalulugi na umano ang kumpanya, hindi ito kapani-paniwala dahil alam naming ang aming produkto (lens para sa mga hard disks at glass disks) ay mataas ang demand. Lalo na at kami ang nagsu-suplay para sa mga branded na produkto tulad ng Seagate, Hitachi, Western Digital, at S Howa Denko. Sa pag-aaral, hindi nalulugi kundi limpak-limpak pa ngang kita ang nakuha ng kapitalistang Hoya mula $27 milyon noong 2012 tungong $37 milyon 2013. Liban na lamang kung hindi marunong magbilang o nabulag na dahil sa pagkaganid ang management, masasabi pa bang pagkalugi ang $10 milyon na nararapat sanang  pantustos sa mga kahilingan ng mga manggagawa? Hindi makatarungan ang naganap na pagsasara. Napagalaman ring namimigay ng flyers na naghi-hire ng mga kontraktwal sa Hoya.

Union busting o pagdurog sa aming itinayong unyon ang tunay na dahilan sa pagsarara. Simula nang ganap na union registration sa Department of Labor and Employment noong Abril 25, 2014 at magwagi ang Certification Elections noong July 31, 2014 ay naging batayan ito ng kapitalistang Hoya upang pilayin ang aming pagkakaisa na maisulong ang mas mataas na sahod, benepisyo at kaseguruhan sa trabaho.  Kalunos-lunos ang aming kalagayan, nakapako sa P315 minimum na sahod ang mga kontraktwal, samantalang ang mga manggagawang regular na higit 15 taon nang nagtatrabaho ay nakatatanggap lamang ng ‘di kukulanging P150 umento sa sahod. Kaya’t kasabay ng pagsasampa sa National Labor Relations Commission (NLRC) ng illegal closure at union busting – dagdag naming  ikinaso ang unfair labor practices, non-payment of 13th month pay at non-payment for sickleave and vacation leave.

Sa kabila ng mga pagsubok, hindi isinuko ng unyon ang laban. Umaasa ang mga manggagawa na paboran kami sa desisyon ng NLRC: ang matupad ang reinstatement ng lahat ng tinanggal na manggagawa at ibigay ang full back wages. Ngunit hindi rin dapat tayo mabulag sa ilusyon na makakamit ito sa madaliang paraan. Tulad ng nangyaring pagkapanalo ng kaso sa Court of Appeals ng tinanggal na 35 manggagawang kontraktwal noong 2013 – sa pamamagitan lamang ng sama-samang pagkilos at matibay na paninindigan lalong mapepressure ang gobyerno na pumanig sa atin. Dapat maging aral ang nangyari sa HOYA, lalo na sa mga kontraktwal at sa mga tinanggal na kailangan ang mas mahigpit na kapasyahan sa pagtatayo ng tunay, palaban, at makabayang unyon.

Dahil sa mga batas na ipinatutupad ng gobyernong Aquino sa utos ng kaniyang mga imperyalistang amo, lalong tayong nasasadlak sa pambubusabos. Pangunahing kaaway ng manggagawa ang Kontraktwalisasyon, mababang pasahod dulot ng Two-tiered Wage System, at mga iskema tulad ng Labor Flexibilization. Hindi lamang kainutilan ang tugon ni Aquino sa kilusang paggawa, kundi mismong panunupil. Nitong Marso 8, 2015 lamang, isang organisador at edukador ng mga manggagawa, si Florencio Romano, ang pinaslang sa Batangas City ng mga elemento ng maka-kapitalistang pulis at militar. Nariyan din ang masalimuot na katotohanan ng Labor Export Policy kaya’t marami manggagawa ang napagsasamantalahan sa ibayong dagat tulad ng nangyari kay Mary Jane Veloso.

Sa darating na Mayo Uno, padadagundungin nating mga manggagawa ang mga lansangan – upang ipanawagan ang kagyat na pagpapatalsik kay Aquino.  Walang mapapala ang manggagawa kung magpapaalipin sa pagkaganid ng mga kapitalista at magpapadikta sa gobyerno! Kailangan nating magkaisa, pag-aralan ang ating kalagayan. Isadiwa ang pakikibaka para sa pagbago ng kalagayan sa pabrika – na manggagawa dapat ang mapagpasya dahil tayo ang lumilikha ng yaman. Angkinin natin ang ating papel sa kasaysayan – bilang proletaryado na siyang pinakaabante ang kamalayan sa praktika upang maitayo ang lipunang patas sa paggawa at walang iilang nagsasamantala!

KATARUNGAN PARA SA 2,600 MANGGAGAWANG ILIGAL NA TINANGGAL NG KAPITALISTANG HOYA! UNYON NG MANGGAGAWA, ITAGUYOD AT PALAKASIN! ITIGIL ANG MALAWAKANG UNION-BUSTING SA MGA PAGAWAAN! IBASURA ANG KONTRAKTWALISASYON AT IPAGLABAN ANG REGULARISASYON! URING MANGGAGAWA MAGKAISA, DURUGIN ANG PAGSASAMANTALA NG GANID NA KAPITALISTA!

~Kalipunan at Saligan ng Manggagawa sa Hoya Glass Disk Philippines – Independent (KASAMA sa HOGP-Ind)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s