PANAGUTIN ANG KAPITALISTANG TANDUAY SA PAKANANG TIGIL-OPERASYON UPANG MAKAIWAS SA INSPEKSYON NG DOLE AT LITUHIN ANG PAGKAKAISA NG MGA KONTRAKTWAL!

DSC_0070

DSC_0070

Mariing ipinapahayag ng Tanggulan Ugnayang Daluyang Lakas ng Anakpawis sa Tanduay Distillers Inc. (TUDLA) ang disgusto sa naganap na iligal na tigil operasyon at forced leave sa Tanduay Distillers Inc. sa Cabuyao, Laguna sapagkat ito ay malinaw na pakana upang lituhin ang pagkakaisa ng mga manggagawang kontraktwal.

Nitong Abril 24 ng umaga, tumambad na lamang sa dalawang linya ng mga manggagawa na walang pasok dahil umano walang sapat na materyales tulad ng bote at karton upang ituloy ang operasyon. Nakatakda ring itigil ang operasyon ng isa pang linya simula bukas. Iligal ang nasabing tigil operasyon at forced leave sapagkat walang nakuhang permiso mula sa Deparment of Labor and Employment.

Ngunit napag-alaman ng TUDLA na sadyang hindi idineliver ng management ang materyales na kailangan upang pwersahang tumigil ang paggawa – na tatagal ng limang araw kaya’t lubusang apektado ang kabuhayan ng humigi’t kumulang 300 manggagawa. Ang limang araw na pagtigil ng operasyon ay tiyak na malaking kaltas sa payslip naming mga manggagawa. Saan ngayon kami kukuha ng pantustos sa aming pamilya gayong nakaasa kami sa tanging trabaho namin?

Hindi kami naniniwala sa pakulo ng management, sa halip ang nakikitang tunay na dahilan ay ang pag-iwas sa nakatakdang inspeksyon ng DoLE hinggil sa petisyon ng mga 397 na manggagawa na maregularisa. Nitong Abril 16 lamang, narehistro sa DoLE ang TUDLA bilang pormal na asosasyon. Sa layunin ng TUDLA na itaas ang sahod ng mga kontraktwal, magkaroon ng mga benepisyo at regularisasyon – pilit itong dinudurog ng management sa pangunguna ni Richard Teng kasabwat ang dilawang unyon ng Pilipino Samahang Manggagawa. Karamihan na sa mga kontraktwal na manggagawa ay nagtatrabaho sa Tanduay ng higit limang taon na, ang ilan pa nga’y dekada na ang inabot subalit kontraktwal pa rin!

Sa loob ng pagawaan ng Tanduay, kadusta-dusta ang kalagayan ng mga kontraktwal na bumubuo ng 90% ng kabuuang manggagawa. Maliban sa mumong sahod, madalas pang delayed ang paglalabas nito. Nalalagay rin kami sa panganib dahil walang ibinibigay na maayos na Personnel Protective Equipment (PPE) ang kumpanya kaya’t madalas may nasusugatan at naoospital tuwing nakakatapak ng bubog o may nababasag na mga bote. Kung nagnanais magkaroon man ng PPE ay kailangan pa itong bayaran at ikaltas sa kakarampot nang pasahod.

Kaya’t hindi na nakapagtataka na ang isang malapit na cronie ng rehimeng US-Aquino na si Lucio Tan ay ganito na lamang kadali ang pagmamaniobra sa kilusang paggawa. Papaanong ang isang taong tulad ni Tan na nagkakahalaga ng $6.1 bilyon o P270 bilyon ay hindi man lamang kayang iregularisa ang 397 na manggagawa at bigyan kami ng mas maalwang buhay? Ganito na lamang kaganid ang pangalawa sa pinakamayaman na negosyante sa Pilipinas! At sa ganitong pangyayari rin napapatunayang hindi kailanman maipagkakasundo ang interes ng mga kapitalista na silang nagsasamantala at kaming mga manggagawa na lumilikha ng yaman.

Iligal sa Labor Code kung maituturing ang ipinapatupad na Labor Only Contracting sa amin ng mga agency ng Global Skills Providers Multi-purpose Cooperative at ang at HD Manpower Service Cooperative sa loob ng Tanduay. Kada kinsenas, ramdam pa ng aming mga sikmura ang mga kung anu-anong kaltas sa aming payslip liban pa sa SSS, Philhealth at Pag-ibig ay ang hindi namin mawaring “insurance providence fund” at “death contribution” o abuloy gayong wala namang manggagawa namamatay buwan-buwan!

Sa ganitong mga palagay, kaming mga manggagawa mula sa TUDLA ay sawang-sawa na sa pandaraya ng mga agency at kapitalista. Naninindigan kami ngayong dapat lumaban para sa mas mabuting kalagayan sa paggawa. Nararapat kung gayon na magkaisa tayong mga manggagawa – lalo na tayong mga kontraktwal – upang igiit ang nararapat nating sahod, benepisyo at kaseguruhan sa trabaho. Tanging sa ating sama-samang pagkilos, makakamit ang pagpapahusay ng ating kalagayan at ang kinabukasan ng ating pamilya’t mga anak!

RICHARD TENG AT LUCIO TAN, GANID SA YAMAN!

397 MANGGAGAWANG KONTRAKTWAL NG TANDUAY, IREGULARISA!

IPAGBAWAL ANG MALAWAKANG KONTRAKTWALISASYON!

ITIGIL ANG PANUNUPIL SA MGA MANGGAGAWA!

TUNAY NA UNYON NG MANGGAGAWA, ITAYO AT IPAGLABAN!

~TANGGULAN UGANAYANG DALUYANG LAKAS NG ANAKPAWIS SA TANDUAY DISTILLERS INC. (TUDLA)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s