Tanduay Distillers Inc. tigil-operasyon para makaiwas sa inspeksyon ng DoLE, Samahan ng mga kontraktwal ginigipit!

Cabuyao, Laguna – Kinukundena ng Pagkakaisa ng Manggagawa sa Timog Katagalugan – Kilusang Mayo Uno (PAMANTIK-KMU) ang naganap na pagtigil ng operasyon at forced leave ngayong umaga ng Abril 24 na magtutuloy umano hanggang Abril 28 sa Tanduay Distiller Inc. bilang panibagong iskema ng panggigipit sa mga kontraktwal na manggagawang lumalaban para sa regularisasyon.

Kaugnay nito ang nakatakdang inspeksyon dapat ng opisyales ng Department of Labor and Employment (DoLE) sa planta na hiniling ng Tanggulan Ugnayang Daluyang Lakas ng Anakpawis sa Tanduay Distillers Inc. (TUDLA). Ang TUDLA ay isang samahan ng mga kontrakwal na opisyal na narehistro sa DoLE noong Abril 16.

Ayon sa management ng Tanduay, itinigil ang operasyon dahil umano sa “kakulangan sa materyales”. Ngunit pinasubalian ito ng TUDLA dahil sa pagkakalap nila ng datos mula sa mga manggagawang namamahala ng mga bote at karton ay sapat naman ang materyales. Ayon pa sa TUDLA, ang naging pagtigil sa operasyon at forced leave ay iligal dahil walang paghahaing naganap sa DoLE at hindi ito pinahintulutan ng nasabing ahensiya.

Ipinatigil ng Tanduay ang operasyon upang makaiwas sa inspeksyon ng DoLE na makita ang trabaho ng mga kontraktwal sa loob ng planta. Liban pa dito, limang araw na walang sahod kaming tinatayang 130 na manggagawa na apektado dahil sa panggigipit na ito,” ani Anse Are, Pangulo ng TUDLA.

Ayon kay Are, nagtayo sila kamakailan ng samahan ng mga kontraktwal dahil hindi na masikmura ng mga manggagawa ang napakababang sahod na ibinibigay ng management, pati na ang kawalan ng mga benepisyo tulad ng sick leave at vacation leave. “Karamihan sa aming 397 na kontrakwal ay higit limang taon nang nagtatrabaho subalit hindi pa rin nareregularisa. Hindi na ito makatarungan sa bahagi naming araw-araw ubos-pagod na pumapasok sa pagawaan,” ani Are. Dagdag pa niya, hindi na nakapagtataka kung bakit isa sa pinakamayamang Pilipino sa ngayon si Lucio Tan dahil na rin sa patuloy na paghuthot sa yamang nililikha nilang mga manggagawa. 44 lamang ang bilang ng regular sa Tanduay, sa ganitong kaayusan, 90% sa kabuuang ineempleyo ang kontraktwal.

Ang Tanduay Distillers Inc. ay nagpapatupad ng Labor Only Contracting (LOC) na iligal na maituturing sa batayan ng Labor Code. Sa kasalukyan, dalawang agency ang nag-eempleyo ng LOC sa planta: Global Skills Providers Multi-purpose Cooperative at ang HD Manpower Service Cooperative.

Nagpapatuloy ang panunupil ng rehimeng US-Aquino sa mga manggagawang lumalaban para sa mas mabuting kalagayan sa paggawa. Mismong ang may-ari ng Tanduay na si Tan ay kilalang cronie ng kasalukuyan administrasyon – kung kaya’t kahit ngayong papalapit na ang Mayo Uno ay nangyayari ang ganitong mga kaso ng paglabag sa karapatan ng mga manggagawa,” saad ni Roque Polido, Tagapangulo ng PAMANTIK-KMU. Dagdag pa ni Polido, asahan na marami pang mga manggagawa ang magpoprotesta dahil sa patung-patong na mga krimen ni Aquino sa bayan. Inaasahan umano ng grupo ang papalaking bilang ng mga unyon at samahang sasama sa kilos-protesta sa Crossing, Calamba sa Mayo 1.

Nakatakdang magsagawa ng piket sa Cabuyao ang mga manggagawa ng Tanduay sa mga susunod na raw. Nagtakda rin sila ng diyalogo sa opisina ng alkade at bise-alkade sa susunod na linggo hinggil sa usapin. Nauna na silang naghain ng grievance nitong simula ng linggo kay Richard Teng, plant manager ng Tanduay, subalit hindi sila nakatanggap ng anumang sagot mula dito. “Hindi kami susuko sa aming laban, bagkus lalo pang pag-aalabin ang aming lakas upang makamit ang aming mga hinaing sa sama-samang pagkilos,” saad ni Are.#

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s