KATARUNGAN SA BRUTAL NA PAGPASLANG KAY FLORENCIO “KA BONG” ROMANO – EDUKADOR AT ORGANISADOR NG OLALIA-KMU

KB2

PRESS STATEMENT

Mariing kinukundena ng Pagkakaisa ng Manggagawa sa Timog Katagalugan – Kilusang Mayo Uno (PAMANTIK-KMU) ang brutal na pagpaslang kay Florencio “Ka Bong” Romano – edukador at organisador mula sa Organized Labor Association in Line Industries and Agricuture – Kilusang Mayo Uno (OLALIA-KMU). Natagpuan ang kanyang katawan ika-6 ng umaga kahapon, Marso 8, sa Brgy. Sorosoro, Batangas City.

Ayon sa initial report ng quick response team (QRT) na binuo ng PAMANTIK at OLALIA, nagtamo ng tama ng 9mm na bala ng baril sa kanyang kaliwang dibdib si Ka Bong. Bago natagpuan ang kanyang wala ng buhay na katawan, galing siya sa Brgy. Ludlod, Lipa City kung saan binisita niya ang dating katrabaho sa RFM Swift. Ikapito ng gabi, inihatid siya sa terminal ng tricycle upang makabalik sa opisina nito sa City Park Subdivision, Lipa City.

Si Ka Bong, na tinatawag din ng kanyang mga kasama bilang “YS”, ay humigit kumulang tatlong taon ng nag-oorganisa ng mga manggagawa sa probinsya ng Batangas. Isa sa mga pangunahing tungkulin niya ay ang pagbibigay sa mga manggagawa ng pag-aaral tulad ng Kurso sa Tunay, Palaban at Makabayang Unyonismo, May 1 History, at iba pa.

Siya din ay kasalukuyang provincial coordinator ng National Coalition for the Protection of Wokers Rights – Southern Tagalog (NCPWR-ST) sa Batangas. Pangunahing kampanya na tinutugunan nila ngayon ay ang regularisasyon ng mga kontraktwal. Sa ilalim ng kontraktwalisasyon, napapanatiling barat ang pasahod at walang benepisyo ang mga manggagawa.

Nagsilbi siya bilang full-time staff ng OLALIA noong 1987 matapos matanggal sa pagawaan ng RFM Swift. Naging bahagi din siya ng Institute for Workers’ Leadership and Development (IWLD) kung saan higit na namaksimisa ang kanyang kakayanan sa pagtuturo sa pamamagitan ng pag-eeduka sa mga manggagawa.

Ani Hermie Marasigan, Tagapangulo ng OLALIA-KMU, “Sa ngayon, wala kaming ibang naiisip na dahilan kundi bahagi ito ng nagpapatuloy na pampulitikang pamamaslang sa mga lider at kasapi ng mga tunay na militante at progresibong organisasyon. Hindi ito simpleng kaso ng pagnanakaw dahil kasama ng kanyang katawan ang kanyang cellphone at wallet. Mataas ang posibilidad na siya ay dinukot bago pinaslang dahil mula sa Lipa City natagpuan ang kanyang katawan sa liblib na bahagi ng Batangas City. Ang ganitong manera, batay sa mga naunang pag-aaral hinggil sa pampulitikang pamamaslang tulad ng kay United Nations Special Rapporteur Philip Alston, ay istilo ng para-military groups, kung hindi man mismo ng AFP o PNP.”

“Nananawagan kami sa mga mamamayan na makiisa sa mga pagkilos na ilulunsad para sa pagpapanawagan ng katarungan sa hindi makataong pagkamatay ni Ka Bong. Sa bahagi ng kanyang mga kasama at inoorganisang manggagawa, maigagawad natin ang katarungan sa pamamagitan ng pagpapatuloy at higit pang pagpapalakas ng laban para sa nakabubuhay na sahod at disenteng trabaho,” pagtatapos ni Christopher Oliquino, Pangalawang Pangulo ng PAMANTIK-KMU.

Ilalagak ang mga labi ni Ka Bong sa Archway Funeral Homes, Balibago, Sta. Rosa City ngayong hapon. ###

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s