Katarungan para kay Ka Fort, Bayani ng Uring Manggagawa!

Siyam na taon na ang nakararaan nang walang-awang pagbabarilin ang lider-unyonista mula sa Nestle Philippines – Cabuyao, na si Diosdado “Ka Fort” Fortuna. Hanggang sa kasalukuyan, wala pa ring nakakamit na hustisya ang mga kaanak at kasamahan ni Ka Fort. Habang patuloy ang paglaki ng yamang naibubulsa ng kapitalistang Nestle mula sa dugo’t pawis ng mga manggagawang pinaglingkuran ni Ka Fort, hindi pa rin nabibigyan ng katarungan ang brutal na pagpatay sa bayani ng uring manggagawa.

Si Ding: Ama, asawa, kapamilya

Isang mapagmahal at pasensyosong ama at asawa ang tulad ni Diosdado Fortuna o Ding sa kanyang mga kapamilya. Ayon sa kanyang mga mahal sa buhay, walang sawa sa pagbibigay ng mga pangaral at paliwanag si Ding ukol sa kanyang paniniwala at hangarin. Hindi rin naging sagka sa kanyang papel bilang ama, asawa, kapatid, anak, at kapamilya ang pagiging lider-obrero ni Ding. Hanggang sa huli, kapakanan ng kanyang mga minamahal sa buhay ang isa sa mga malalaking prayoridad ng kanyang pag-iral.

Si Fortuna: Manggagawa, lider-unyonista

Dekada ’80 pa lamang, masipag at matiyaga nang nagsakripisyo si Fortuna bilang isang manggagawa sa planta ng Nestle Philippines sa Cabuyao. Naranasan niya kung gaano kahirap at kalunus-lunos ang kalagayan ng mga manggagawa ng Nestle. Habang ang #1 food corporation sa buong bansa, Nestle, ay nakatatamasa ng napaka-laking tubo mula sa paghihirap ng mga manggagawa, sukdulang kabaliktaran naman ang tanging nakukuha ng mga manggagawa nito.

Ayon sa pag-aaral ng mga manggagawa ng Nestle at ng mga taga-suporta nito, ang sahod na nakukuha nila kapalit ng isang buong araw na paggawa sa loob ng pabrika, ay kapalit lamang ng 5 minuto ng kanilang paggawa – kung tutuusin mula sa kapital, kita, at tubo ng kapitalistang Nestle. Ito ang nagtulak kay Fortuna para maging aktibo sa unyon ng mga manggagawa sa Nestle, ang United Filipro Employees sa ilalim ng Drug, Food, and Allied Industries – Kilusang Mayo Uno (UFE-DFA-KMU).

Sa pagiging masigasig at bukal sa pusong paglilingkod ni Fort sa kanyang kapwa manggagawa, naihalal siya bilang presidente ng UFE-DFA-KMU. Naging lalong matingkad ang pagpupursige ni Fort upang isulong ang interes ng kanyang mga ka-manggagawa sa pamamagitan ng paggigiit sa kapitalistang Nestle na pagbigyan ang mga manggagawa sa isang makatwiran at makataong Collective Bargaining Agreement (CBA). Subalit, hindi ito dininig ng kapitalistang Nestle, hindi ito umayon sa hiling ng mga manggagawa na magkaroon ng sapat at maayos na benepisyo para sa mga retiradong manggagawa at sa halip ay nagpataw ng deadlock para sa nasabing negosasyon. Bagamat naipanalo ng manggagawa ang laban sa Korte Suprema noong 2001, hindi pa rin nagpailalim dito ang kapitalista, kaya’t naglunsad ng welga ang mga manggagawa ng Nestle noong ika-14 ng Enero taong 2002.

Naging isa sa pinaka-maiinit na laban ng mga manggagawa sa buong bansa ang kinaharap ng mga manggagawa ng Nestle. Sa bawat inilulunsad nitong kilos-protesta sa labas ng pagawaan, laging nakararanas ng mararahas na dispersal ang mga manggagawa mula sa pinagsamang lakas ng AFP, PNP, at private guards ng kapitalista. Hindi tuluy-tuloy na naitatambol sa mga pahayagan ang laban ng mga manggagawang ito dahil sa kapangyarihang pang-ekonomiyang taglay ng kapitalistang Nestle bilang isa sa mga pangunahing advertisers sa midya.

Ka Fort, bayani ng uring manggagawa

Sa kanyang ipinakitang husay at dedikasyon sa pakikipaglaban para sa interes ng uring manggagawa, kinilala rin siyang tagapangulo ng Pagkakaisa ng Manggagawa sa Timog Katagalugan – Kilusang Mayo Uno (PAMANTIK-KMU), miyembro ng Pambansang Konseho ng KMU, tagapangulo ng panrehiyong balangay ng Anakpawis Partylist, at tagapangulo ng National Coalition for the Protection of Workers Rights – Southern Tagalog (NCPWR-ST).

Tuluy-tuloy at walang mintis siyang nangunguna sa bawat pagkilos at aktibidad ng mga manggagawa. Naging simbolo siya ng pakikibaka para sa sahod, trabaho, at karapatan sa Timog Katagalugan. Ito ang naging dahilan kung bakit naging mainit siya sa mata ng estado. Sa ilang taon bago siya bawian ng buhay, matinding surbeylans at panghaharas ang dinanas ni Ka Fort mula sa mga elemento ng militar at bayarang goons ng Nestle. Naibilang ang kanyang pangalan sa military hitlist o listahan ng mga kailangang patayin ng Armed Forces of the Philippines (AFP).

Kaya naman hindi kataka-taka, bagamat sobrang nakakalungkot at nakakapag-ngalit, nang pagbabarilin ng naka-motorsiklong kalalakihan si Ka Fort habang papauwi sa kanilang bahay noong ika-22 ng Setyembre 2005. Iniwang nakahandusay sa isang madilim na kalsada, tinakpan ng dahon, patay nang natagpuan ang dakilang si Ka Fort na may tama ng bala sa kanyang puso at atay. Ika-64 na biktima ng pampulitikang pamamaslang si Ka Fort sa ilalim ng rehimeng US-Arroyo, ika-2 pangulo, sunod kay Meliton “Ka Mel” Roxas, rin ng UFE-DFA-KMU na pinapatay ng kapitalistang Nestle, at isa sa napakaraming bilang ng manggagawa ng Nestle na namatay sa kahabaan ng welga.

Ka Fort, modelo ng bawat manggagawa sa kasalukuyan

Siyam na taon man ang lumipas, hindi pa rin kailanman nalimutan ng mga manggagawa sa Timog Katagalugan ang napakalaking ambag ng dakilang si Ka Fort. Hanggang sa kasalukuyan, laman pa rin ng mga talakayan at pag-aaral na pinaghuhugutan ng inspirasyon ang kabayanihan at kadakilaang naipamalas niya.

Hanggang sa ngayon, tulad ng dinanas ni Ka Fort at ng iba pang manggagawa ng Nestle, dinaranas din ng mga manggagawa sa Timog Katagalugan ang matinding pambubusabos ng mga kapitalista. Idagdag pa rito ang pag-ayuda ng gobyerno sa burgesya para mas lalo itong mag-kamal ng supertubo at pahirapan ang mga manggagawa sa pamamagitan ng iba’t ibang mga anti-manggagawang polisiya tulad ng Two-Tiered Wage System, Labor-Only Contracting, No union – No strike policy, Tripartite Industrial Peace Council Manifestos of Commitment, Labor Flexibilization, Compressed Workweek, at marami pang iba sa ilalim ng rehimeng US-BS Aquino. Gayundin ang kabi-kabilang paglabag sa karapatang pantao ng mga manggagawa at mamamayan.

Sa mga aral na naiwan ni Ka Fort at ng iba pang obrerong martir kumukuha ng lakas at inspirasyon ang mga manggagawa upang patuloy na makipaglaban at ipagtagumpay ang kanilang pangunahing interes. Panata ng mga manggagawa ang patuloy na paghahanap ng hustisya para kay Ka Fort at sa lahat ng biktima ng pasismo ng estado.

Katarungan para kay Diosdado “Ka Fort” Fortuna!
Katarungan para sa lahat ng biktima ng paglabag sa karapatang pantao!
Pagbayarin ang mamamatay-manggagawang Nestle! BOYKOT NESTLE!

 

KFort

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s